رویداد خبري آژانس په افغانستان کې لومړنۍ دیجټلي خبري آژانس
د ترکیې ولسمشر، رجب طیب اردوغان د روسیې ولسمشر ولادیمیر پوتین ته ویلي چې ترکیه کولای شي د مسکو او کییف ترمنځ د جګړې د پای ته رسولو لپاره لاره هواره کړي او داسې عادلانه سوله ممکنه کړي چې د دواړو خواوو په ګټه وي.
د ترکیې د ولسمشرۍ دفتر پرون (چهارشنبې د چنګاښ۱۳مه) ویلي چې د دغه هېواد ولسمشر رجب طیب اردوغان او د هغه روسي سیال، ولادیمیر پوتین د قزاقستان په پلازمېنه استانه کې سره کتلي او د اوکراین او غزې د جګړې د پای ته رسولو پر لارو چارو او همداراز د سوریې پر جګړې او له ترهګرۍ سره پر مبارزې یې خبرې کړې دي.
خو د پوتین ویاند، ډیمیټري پیسکوف دا احتمال رد کړی چې د ترکیې ولسمشر به د منځګړي په توګه کار وکړي.
د دې پوښتنې په ځواب کې چې ایا اردوغان کولی شي دا ډول رول ولوبوي، ښاغلي پیسکوف په یوه تلویزیوني مرکه کې ویلي: “نه، دا ممکنه نه ده.”
ترکیه د ناټو غړې ده چې د متحده ایالاتو په مشرۍ پوځي اتحاد دی، خو د ناټو د نورو مشرانو برعکس چې د پوتین پر حکومت یې بندیزونه لګولي دي، اردوغان هڅه کړې چې له روسیې او اوکراین سره ښې اړیکې وساتي.
