رویداد خبري آژانس په افغانستان کې لومړنۍ دیجټلي خبري آژانس
متحده ایالاتو (دوشنبې، د وږي ۵مه) ویلی چې اسراییل اوس هم د ایران او متحدینو د برید له ګواښ سره مخ دی.
د امریکایي ځواکونو دا څرګندونې له هغې وروسته وشوې چې د لبنان د حزب الله قومندان فواد شکر د وژل کېدو په غبرګون کې یادې ډلې د سلګونو راکټونو او بې پیلوټه الوتکو په واسطه پر اسراییلو برید وکړ.
د امریکا غږ دراپور له مخې، د امریکا د دفاع وزارت ویاند، پاټریک رایډر د ایراني ځواکونو او متحدانو څرګندونې ته په اشارې یې ویلي: ” موږ د دې موضوع ارزونې ته دوام ورکوو چې د برید خطر شته او موږ… د اسراییلو څخه د دفاع او یا په داسې حال کې چې زموږ په ځواکونو برید وشي موږ چمتو یوو.”
په ورته وخت کې د ایران د بهرنیو چارو وزیر، عباس عراقچي خپل ایټالیایي سیال ته ویلي، چې په تهران کې د هنیه د وژلو ځواب به حتمي او حساب شوی وي.
له بلې خوا د ایران د بهرنیو چارو وزارت دوشنبې د عراقچي له قوله په یوه اعلامیه کې ویلي: “په داسې حال کې چې ایران له اسراییلو هېڅ وېره نه لري، خو د اسراییلو د حکومت برعکس د کړکېج غوښتونکي نه دي.”
د ایران حکومت اسراییل د اسماعیل هنیه د ترور لامل بولي، خو اسراییل په دې ترور کې لاس لرل نه منلي او نه یې رد کړي دي.
دا په داسې حال کې ده چې په تهران کې د حماس د سیاسي دفتر مشر، اسماعیل هنیه وژل او د اسراییلو په برید کې د لبنان په پلازمېنه بیروت کې د حزب الله یو قومندان وژنه په سیمه کې د ایران، اسراییلو او متحدینو تر منځ جګړې د خطر د زیاتوالي لامل شوي دي.
