رویداد خبري آژانس په افغانستان کې لومړنۍ دیجټلي خبري آژانس
د امریکا غږ د راپور له مخې د امریکا د بهرنیو چارو یو ویاند شنبه د جولای شپږمه (د چنګاښ ۱۶مه) ویلي چې د ایران د ولسمشرۍ ټاکنې «شفافې او عادلانه» نه وې او د ایران پر وړاندې د امریکا په پالیسۍ کې بدلون نه دی راغلی.
د امریکا د بهرنیو چارو وزارت دې ویاند د نوم نه خپرولو په شرط ویلي: “ډېر شمېر ایرانیانو پرېکړه کړې وه چې په ټاکنو کې ګډون ونه کړي موږ هېڅ تمه نه لرو چې دا ټاکنې دې د ایران په مسیر کې بنسټیز بدلونونه راولي یا یې د هېواد بشري حقونو ته لاره هواره کړي.”
د امریکا د بهرنیو چارو وزارت دې چارواکي د ایران د ولسمشرۍ د ټاکنو د نوماندانو څرګندونې رد کړې او ویلي یې دي چې” نوماندانو په خپله ویلي چې د اسلامي جمهوریت پالیسي د دې مشر علي خامنه یي له خوا ټاکل کېږي.”
د امریکا د بهرنیو چارو د وزارت دې ویاند دا هم ویلي: “ټاکنې به له ایران سره زموږ په چلند باندې د پام وړ اغېز ونه کړي. د ایران د فعالیت په اړه زموږ اندېښنې نه دي بدلې شوې. موږ هغې ډیپلوماسۍ ته ژمن یو چې د امریکا ګټې خوندي کوي.”
بلخوا د امریکا برعکس د روسیې، چین، هند او سوریې مشرانو د شنبې په ورځ د ایران د ټاکنو په دویم پړاو کې مسعود پزشکیان ته د بریا مبارکي ویلې ده.
د ایران د ټاکنیز دفتر د راپور له مخې، له ۳۰ میلیونه ۵۳۰ زره ۱۷۵ رایو څخه مسعود پزشکیان ۱۶ میلیونه ۳۸۴ زره ۴۰۳ رایې او د هغه سیال سعید جلیلي ۱۳ میلیونه ۵۳۸ زره ۱۷۹ رایې ترلاسه کړې دي.
