رویداد خبري آژانس په افغانستان کې لومړنۍ دیجټلي خبري آژانس
د امریکا د ولسمشر جو بایډن تر اعلان وروسته د امریکا بي ۵۲ جنګي الوتکو د افغانستان په ځینو برخو کې هوایي بریدونه کړي دي.
د افغانستان د ملي دفاع وزارت د معلوماتو له مخې دغه الوتکو پرون شنبې (د زمري ۱۶مه نېټه) په ورځ ناوخته د جوزجان په مرکز شبرغان کې د طالبانو پر یوه ګروپ هوایي بریدونه کړي دي.
دفاع وزارت ادعا کوي چې په دې برید کې شاوخوا سل کسه طالبان وژل شوي دي.
بلخوا په ولسي جرګه کې د جوزجان د خلکو استازې حلیمې صدف هم تایید کړې چې یادو الوتکو تېره شپه وقفه يي هوايي بریدونه کړي دي او هغه طالبان یې په نښه کړي چې پر شبرغان یې بریدونه کړي دي.
د نوموړې په خبره طالبان په تيپ لېوا کې د وسلو او مهماتو د راټولولو په حال کې وو چې د هوایي برید ښکار شول او شاوخوا سل کسه ووژل شول.
طالبانو په دې اړه څه نه دي ویلي. د امریکايي پوځ د مرکزي قومندانۍ ویاند هم تایید کړې چې دوی هوایي بریدونه پيل کړي خو د وخت او ځای په اړه یې څه نه دي ویلي.
