رویداد خبري آژانس په افغانستان کې لومړنۍ دیجټلي خبري آژانس
د افغانستان بهرنيو چارو وزارت خبر ورکړی چې د نوموړي وزارت سرپرست اميرخان متقي د ايران له بهرنيو چارو وزير امير عبداللهيان سره په ايران کې د مېشتو افغان کډوالو، د دواړو هېوادونو پر اړيکو او دغه راز پر اقتصادي همکاريو خبرې کړي.
د خبرپاڼې له مخې په دې ټليفوني خبرو کې هوکړه شوې، چې د افغانستان سرپرست حکومت يو پلاوی به په نږدې راتلونکي کې په ايران کې د افغان کډوالو وضعيت د ارزونې په موخه دې هېواد ته سفر وکړي.
د بهرنيو چارو وزارت په خبرپاڼه کې دغه راز ويل شوي، ځيني کړۍ هڅه کوي څو د ايران او افغانستان ترمنځ سياسي اړيکې خرابې کړې؛ خو د خبرپاڼې له مخې، دواړو لوريو ټينګار کړی چې يادو کړيو ته به د دې کار اجازه ور نه کړي.
دا په داسې حال کې ده چې په دې وروستيو کې د خواله رسنيو کاروونکو له لوري په يادو رسنيو کې داسې وېډيوګانې او انځورونه خپاره شول، چې په ايران کې يې له افغان کډوالو سره د دغه هېواد د خلکو او امنيتي ځواکونو له لوري زور زياتی په ډاګه کاوه.
