رویداد خبري آژانس په افغانستان کې لومړنۍ دیجټلي خبري آژانس
د افغانستان د کرېکټ له نولس کلنو کم عمره ملي لوبډلې له سريلانکا او بنګله دېش سره په درې اړخیزې لوبلړۍ کې یو ځل بیا سریلانکا ته په ۴ منډو ماته ورکړه او په دې توګه د دغو سیالیو پایلوبې ته ورسېده. دا پنځوس اوریزه لوبې د متحدو عربي اماراتو ابوظبۍ کې کېږي.
دا په دې لوبلړۍ کې د افغانستان له نولس کلنو د کم عمره ملي لوبډلې څلورمه لوبه او دریمه بریا وه. د دې لوبې پچه د افغان تنکیو ځوانانو لوبډلې وګټله او پخپله یې د توپوهنې پرېکړه وکړه. افغانستان د نعمان شاه د ۱۱۶ او د محمد هارون او سهیل خان د نیمه سلیزو په مټ د ۷ لوبغاړو په سوځېدو سیالي لوبډلې ته د ۳۲۴ منډو نسبتآ ستر هدف وټاکه.
د سریلانکا لوبډلې د توپوهنې پیل ښه نه و او د سر درې لوبغاړي یې ژر یو په بل پسې وسوځېدل. دا درې واړه لوبغاړي د افغانستان کیڼ لاسي چټک توپ اچوونکي بشیر احمد وسوځول. هغه وروسته ۴ نورې ویکټې هم واخیستې او د ټولټال ۷ لوبغاړو په سوځولو سره د دې لوبې غوره لوبغاړی هم شو.
د سریلانکا د منځ لوبغاړو نسبتآ اوږده پاڼې ولوبوله او شاوون دانیل پکې په ۱۱۵ توپونو ۱۴۰ چټکې منډې وکړې. خو دا کافي نه وه او د سریلانکا وروستۍ لوبغاړی د وروستي اوور په ۳ توپ په داسې حال کې وسوځېد چې د لوبې ګټلو لپاره یې ۵ منډو ته اړتیا درلوده.
د افغانستان د تنکیو ځوانانو لوبډله په دې درې اړخیزه لوبلړۍ کې له خپلو څلورو د دریو لوبو په ګټلو سره د پواینټونو جدول په سر کې ده او پایلوبې ته ووته.
ټاکلې د دغو سیالیو پایلوبه د راتلونکې پنجشنبې پر ورځ وشي.
