رویداد خبري آژانس په افغانستان کې لومړنۍ دیجټلي خبري آژانس
د روسیې د بهرنیو چارو وزارت ویاندې ماریا زاخارووا وايي چې د افغانستان په اړه د مسکو فارمټ شپږمه غونډه به د اکټوبر په څلورمه جوړه شي.
د ا.ا د بهرنيو چارو وزارت د وياند مرستيال حافظ ضياء احمد تکل هم ویلي چې د دغه وزارت د سرپرست، مولوي اميرخان متقي په مشرۍ يو پلاوي روسيې ته سفر کړى او د افغانستان په استازيتوب به په دې غونډه کې ګډون وکړي.
د مسکو فارمټ د ۲۰۱۶ کال په ډسمبر کې جوړه شوې او د روسیې، افغانستان، چین، پاکستان، ایران او هند استازي پکې شامل دي. په دغو ناستو کې به د دغو هېوادونو استازي د افغانستان پر اړوندو موضوعاتو بحث او نظرونه به سره تبادله کړي.
د مسکو فارمټ پنځمه غونډه د پروسږ کال په همدې وخت کې د روسیې په کازان ښار کې جوړه شوې وه او د قطر، متحده عربي اماراتو او ترکیې استازو هم په کې د مېلمنو په توګه ګډون کړی و.
دا یادونه هم ضروري ده چې د پروسږ کال په غونډه کې د قزاقستان، قرغزستان، تاجکستان، ترکمنستان او ازبکستان په ګډون پنځه نور هېوادونه هم په دې فارمټ کې شامل شوي وو.
د پروسږ کال په غونډه کې ګډون کوونکو هېوادونو په افغانستان کې د ترهګرو ډلو پر فعالیتونو اندېښنه څرګنده کړه.
