رویداد خبري آژانس په افغانستان کې لومړنۍ دیجټلي خبري آژانس
ټاکل شوې چې نن سېشنبه د (وري په ۲مه) د پاکستان په پلازمېنه اسلاماباد کې د اسلامي همکاريو سازمان غړو هېوادونو بهرنيو چارو وزيران غونډه وکړي.
په دې دوه ورځنۍ غونډه کې د اسلامي هېوادونو د اړوند مسايلو ترڅنګ به، د افغانستان پر اوسني اقتصادي او بشري وضعيت هم بحث وشي.
له دې غونډې يوه ورځ وړاندې پرون دوشنبه د (وري په لومړۍ) د اسلامي همکاريو د سازمان مشر حسېن ابراهيم طحه د اسلامي پراختيايي بانک په چوکاټ کې د افغانستان لپاره د مالي مرستې د راټولولو يو صندوق پرانيست.
نوموړي په دې اړه يوه خپره کړې اعلاميه کې ويلي، د اسلامي همکاريو سازمان افغانستان ته د مرستو په راټولو کې پر خپلو کړو ژمنو ولاړ دی او له ممکنه لارو هڅه کوي څو دغلته د بشري بحران په مهارولو کې همکاري وکړي.
د افغانستان لپاره د مالي مرستو د را ټولولو صندوق په اړه دغه پرېکړه، د اسلامي همکاريو سازمان د غړيو هېوادونو له لوري د نوموړي سازمان په تېره غونډه کې شوې وه.
