رویداد خبري آژانس په افغانستان کې لومړنۍ دیجټلي خبري آژانس
د «نړیوال مرکزي پخلنځي» مرستندویه موسسې د کارکوونکو پر موټر باندې د اسراییلو له هوايي برید څخه دوې ورځې وروسته، د امریکا ولسمشر جو بایډن ویلي چې دی پر دې پېښه «غوسه او زړه مات شوی» دی.
بایډن پرون (سې شنبه، د حمل ۱۴ مه) په یوه خبري کنفرانس کې پر اسراییلو انتقاد کړی چې د ژغورنې د کارکوونکو د ژوند د خوندیتوب لپاره یې کافي اقدامات نه دي کړي.
ښاغلي بایډن ټینګار کړی چې د دې پیښې په اړه د اسراییلو څېړنې باید «چټکې او مسوولانه» وي، او پایلې یې باید په ډاګه شي.
تېره دوشنبې د اسراییلو په هوايي برید کې د یوې مرستندویه موسسې کارکوونکي د فلسطیني موټر چلوونکي سره ووژل شول.
په راپورونو کې وژل شوي د اسټرالیا، بریتانیې، پولنډ، امریکا او کاناډا اتباع بلل شوي دي.
بلخوا د بريتانيا لومړي وزير ريشي سوناک د بريد په اړه د سمدستي پلټنو غوښتنه کړې او د اسټراليا لومړي وزير انتوني البانيز هم ويلي، چې د اسراییلو لومړي وزير بنيامين نتنياهو ته يې خپل احتجاج څرګند کړی دی.
د ویلو ده چې د دوشنبې له هوايي برید وروسته د دې مرستندویې موسسې په ګډون څو مرستندویه موسسو اعلان وکړ چې دوی په غزه کې خپل عملیات ځنډوي.
