رویداد خبري آژانس په افغانستان کې لومړنۍ دیجټلي خبري آژانس
د جرمني صدراعظمې انګیلا مرکل د دوشنبې په ورځ جولای ۲۰ (چنګاښ ۳۰) هیله څرګنده کړه چې ښایي نن به د اروپایي ټولنې مشران د شاوخوا دوه تریلیون ډالرو د مرستې په بستې باندې موافقه وکړي چې د کروناویروس د وبا په وجه ددې ټولنې د ځپل شوي اقتصاد د رغونې په مقصد کارول کیږي.
آغلې مرکل وویل: «مونږ تیره شپه د اوږدو مذاکراتو وروسته د ممکنې موافقې لپاره یو چوکاټ رامنځ ته کړ.» هغې د بلجیم پایتخت بروکسل ته د رسیدو پر وخت خبریالانو ته دا هم وویل چې دغه پرمختګ دا هیله راژوندۍ کوي چې ښایي نن دوشنبه موافقه ترلاسه شي.
د فرانسې جمهور رئیس ایمانویل مکرون هم د اروپایي ټولنې د مشرانو د موافقې په اړه خوشبین دی او نن هغه هم بروکسل ته د رسیدو پر وخت وویل چې: «ورځ د پرمختګ په ژمنو پیل کوم.»
د کروناویروس سره د مبارزې او د اروپایي ټولنې د اقتصاد د رغیدو لپاره د دوه تریلیون ډالرو د مرستو پر دغه بستې باندې د نظر اختلاف هغه وخت رامنځ ته شو چې د جرمني صدراعظمې انګیلا مرکل او د فرانسې جمهور رئیس ایمانویل مکرون د اروپایي ټولنې د مشرانو له غونډې ووتل.
د اروپایي ټولنې د شمال څلور بډایه غړي هیوادونه د محدودو مرستو او د دغې ټولنې جنوب هیوادونو لپاره د مرستو د سختو شرایطو غوښتونکي دي. دغه هیوادونه د کروناویروس سخت ځپلي دي.
