رویداد خبري آژانس په افغانستان کې لومړنۍ دیجټلي خبري آژانس
د ارمنيا او اذربايجان ترمنځ د روسيې په منځګړېتوب له څو مياشتني اوربند وروسته، په ناګورنو قرهباغ سيمه کې يو وار بيا د دواړو هېوادونو ترمنځ جګړه پيل شوې.
تازه د ارمنيا لومړي وزير نيکول پاشينيان ويلي، چې له اذربايجان سره ګډې پولې ته څېرمه يې په جګړه کې ۴۹ سرتېري وژل شوي دي.
د نوموړي له دې ادعا سره سم نړيوالو له دواړو هېوادونو په سم لاسي توګه د جګړې د درولو غوښتنه کړې ده.
د نړيوالو ترڅنګ د روسيې بهرنيو چارو وزارت هم اعلان کړی، چې دواړو خواوو ترمنځ له نن سهار راهيسې يو وار بيا پر اوربند هوکړه شوې.
د دې وزارت له لوري په خپاره شوي بيان کې هيله ښودل شوې، چې دواړه هېوادونه دې د روسيې په منځګړيتوب د رامنځته شوي اوربند هوکړې ته پابند پاتې شي.
د ارمنيا او اذربايجان ترمنځ جګړه په تېر ۲۰۲۰ کال کې د روسيې په منځګړيتوب د اوربند د يوې هوکړې پر بنسټ پايته ورسېده. خو پر دې سربېره هم وخت ناوخت په ناګورنو قرهباغ سيمو کې دواړو هېوادونو د سرتېرو ترمنځ جګړې کېږي.
دواړه هېوادونو د يادو جګړو پړه پر يوه او بل ور اچوي.
