دفاع وزارت په زابل کې د طالبانو له زندانه دیوشمېر ملکي کسانو په ګډون ۴۳ سرتیري آزاد کړي

په زابل ولایت کې د افغان امنیتي قواوو د اپراتیفي فعالیتونو په پایله کې د یوشمېر ملکي کسانو په ګډون د دفاعي او امنیتي ځواکونو ۴۳ سرتیري د طالبانو له زندان څخه آزاد شوي دي.

د افغانستان د ملي دفاع وزارت په خپره شوې خبرپاڼه کې لیکلي؛ تېره شپه د زابل ولایت د شاه جوی په ولسوالۍ کې د افغان امنیتي قواوو د اپراتیفي فعالیتونو په پایله کې د یوشمېر ملکي کسانو په ګډون د دفاعي او امنیتي ځواکونو ۴۳ تنه سرتیري د طالبانو له زندان څخه آزاد شول.

په خبرپاڼه کې راغلي:” ۴۳ تنو له ډلې، د ۴ ملکي کسانو په ګډون ۲۰ تنه قلات ښار ته ولېږدول شول او پاتې نور د زابل ولایت په نورو سیمو کې له افغان دفاعي او امنیتي ځواکونو سره یوځای شول. دغو سرتیرو ژمنه وکړه چې د خلکو د ځان او مال د دفاع په موخه به بیرته د افغان ځواکونو په لیکو کې خپلې مبارزې ته دوام ورکړي.”