رویداد خبري آژانس په افغانستان کې لومړنۍ دیجټلي خبري آژانس
د افغانستان د ملي دفاع وزارت په بغلان ولایت کې د وسله والو طالبانو د پوځې کمېسیون د مرستیال د وژلو ادعا وکړه.
دفاع وزارت نن یکشنبه(د کب ۱۰مه نېټه) په یوه خبرپاڼه کې ویلي چې د قاري زاهد الله په نوم د طالبانو د پوځي کمېسیون مرستیال چې د طالبانو د ګمرک مسوول هم و، پرون له دوو نورو وسله والو سره په نهرین ولسوالۍ کې د افغان امنیتي ځواکونو په هدفي حملو کې وژل شوي دي.
په دغو حملو کې د څلورو نورو وسله والو د ټپي کېدو، د دوی د یوې اندازې وسلې او مهماتو د تخریب خبر هم ورکړل شوی دی.
وسله والو طالبانو د دې پېښې په اړه تبصره نه ده کړې.
