د خيبر پښتونخوا ځايي چارواکو خبر ورکړی چې په ټانک ولسوالۍ کې د پاکستاني پوځيانو پر يوه قرارګاه بريد شوی او په کې ګڼو پوځيانو ته مرګ ژوبله اوښتې ده.
دغه بريد په ټانک کې د پاکستان د پوځ مسوولانو هم تائيد کړی او ويلي يې دي، چې ياد بريد تېر شپه ناوخته پيل نن چهارشنبه د سهار تر اوو بجو يې دوام وکړ.
چارواکو ويلي چې د دې بريد له امله ۳ تنه پوځيان وژل شوي او له ۱۵ ډېر ټپيان شوي دي؛ خو ځايي اوسېدونکي بيا د وژل شوو پاکستاني پوځيان شمېر له دې زيات ښيي.
د ځايي سرچينو د مالوماتو له مخې، د تېرې شپې په بريد کې له ۱۰ زيات پاکستاني پوځيان وژل شوي او ډېر نور ټپيان شوي دي.
د ياد بريد مسوليت تحريک طالبان پاکستان يا TTP په غاړه اخيستی او په ترڅ کې يې ګڼو پاکستاني پوځيانو ته د مرګ ژوبلې اړولو ادعا کړې ده.
په دې وروستيو کې پر پاکستاني پوځيانو د تحريک طالبان پاکستان ډلې له لوري خونړي بريدونه زيات شوي او ورته د درنې مرګ ژوبلې اوښتو له امله پاکستاني پوځيان اړ کېږي چې له خپلو پوستو او قرارګاوو په شا شي.