خوست کې يو ډله ييز قبر موندل شوى

د خوست سیمه ییزو مسوولینو په دغه ولایت کې د یو ډله ییز قبر د موندلو خبر ورکړی دی.
د خوست ښاروال، بسم الله بلال وايي، چې په دغه ډله ييز قبر کې شاوخوا سل جسدونه موندل شوي، چې ښايي د شوروي اتحاد له ملاتړ برخمنو حکومتونو په وخت کې پاتې وي.
د خوست د ښاروال په وينا، دغه ډله ييز قبر د دغه ولايت په مرکز اړوند په ساربانی سيمه کې د يوه کوچني بند د جوړولو پر مهال موندل شوى دى.
ښاغلي بلال دا هم ویلي چې په دغه ډله ییز قبر کې ښخ شوي اکثره کسان ملکي وګړي دي.
د يادونې ده، چې تر دې مخکې سيمه ييزو چارواکو په کندهار ولايت کې د يو بل ډله ييز قبر د موندلو خبر ورکړى و.