رویداد خبري آژانس په افغانستان کې لومړنۍ دیجټلي خبري آژانس
د امریکا د پوځ مرکزي قوماندانۍ (سنتکام) وايي چې د حوثیانو له خوا پر بریتانوي کښتۍ تر برید وروسته په سمندر کې د سوځېدلو تېلو ۲۹ کیلومتره نښې څرګندې شوې دي.
سنتکام پرون جمعه د فبروري ۲۳مه، ویلي چې په سره سمندرګي کې د «روبي مار» په نوم بریتانوي کښتۍ د حوثیانو برید کښتۍ ته زیان رسولی او په سمندرګي کې خاصې نښې څرګندې شوې دي.
د سنتکام د معلوماتو له مخې، چې کښتۍ لنگر اچولی، خو اوبه لاهم دې کښتۍ ته ننوځي.
سنتکام دا خبرداری هم ورکړی چې «د روبي مار» کښتۍ د برید په وخت کې له ۴۱ زرو ټنو ډېرې سرې بار کړې وې چې کیدای شي په سره سمندرګي کې له تویېدو وروسته د چاپېریال ناورین لاپسې زیات کړي.
د امریکا د پوځ مرکزي قوماندانۍ په خبرپاڼه کې ویل شوي چې د فبرورۍ په ۱۸مه یمني حوثیانو د برتانیا پر هغه کښتۍ برید کړی چې په سره سمندرګي کې د «بلیز بیرغ» لاندې روانه وه.
سنتکام ټینګار کړی: “حوثيان په خپلو بریدونو سره له سیمهییزو اغېزو څخه غافل دي او د ساحلي ټولنو د کب نیولو صنعت او د سیمې د خوراکي توکو نړیوال تجارت ګواښي.” د ویلو ده چې د حوثیانو لخوا په سره سمندرګي کې پر سوداګریزو کښتیو بریدونه پر غزې د اسراییلو له برید وروسته پیل شوي او حوثیانو خبرداری ورکړی چې دا بریدونه په غزه کې د اسراییلي پوځ د پوځي عملیاتو ځواب دی
