رویداد خبري آژانس په افغانستان کې لومړنۍ دیجټلي خبري آژانس
ننګرهار کې ځايي سرچینې وايي چې له پاکستاني ځواکونو سره د تېرې چهارشنبې ورځې تر نښتې وروسته نن درېیمه ورځ هم پر ډيورنډ کرښه د تګ راتګ لار تړلې پاتې ده.
د ننګرهار د رسنیو دفتر خلکو ته خبرداری ورکړی چې پر دې لاره له سفر کولو ډډه وکړي.
دې ادارې پر اېکس یا ټوېټر همدا راز لیکلي، “د ستونزو حل په موخه د دواړو لورو تر منځ خبرې روانې دي، هیله ده چې ښه پایله به ولری”
تورخم لار پر ډيورنډ کرښه د خلکو د اوښتو راوښتو تر څنګ د افغانستان او پاکستان تر منځ د سوداګرۍ او ټرانزیټ لپاره هم یوه مهمه لار ده.
د تېرې چهارشنبې په ورځ په دغه سیمه کې د سرحدي ځواکونو او پاکستاني پوځیانو ترمنځ نښته رامنځته شوه، چې په پایله کې یې یو امنیتي سرتیري او یو چلونکی ووژل شوو، خو پاکستاني لوري بیا تر دې دمه د تلفاتو په اړه څه نه دی ویلي.
