رویداد خبري آژانس په افغانستان کې لومړنۍ دیجټلي خبري آژانس
د افغانستان د بشري حقونو خپلواک کمېسيون وايي، د مسوولو بنسټونو له لوري د رسنيو، مدني فعالانو او د بشر حقونو د مدافعانو هدفي وژنو په اړه لا هم خپلو عدالت غوښتنو ته نه دي رسېدلي او له همدې امله يې خواشينې څرګنده کړې ده.
دې کمېسيون د خپلو دوو کارکوونکو فاطمه نتاشا خليل او احمد جاوېد فولاد د ترور تلين پوره کېدو په تړاو ويلي، تر اوسه مسوولو بنسټونو په دې اړه د څېړنو، د تورنو کسانو د پېژندنې، تعقيب او عدالت د تامين په برخه کې د کمېسيون غوښتنو ته د قناعت وړ ځواب نه دی ورکړی.
د افغانستان بشري حقونو خپلواک کمېسيون په دې اړه خپل ټوېټر کې ويلي، حکومت بايد مسوول وي او له مجازاتو د معافيت له فرهنګ سره دې جدي مبارزه وکړي څو په خبره يې د وګړو بشري حقونه خوندي شي.
دا کمېسيون دغه راز غوښتنه کوي چې د ملکي وګړو پر وړاندې د جنايتونو، هدفي وژنو، پر قومي او ژبنيو لږکيو او تعليمي بنسټونو د بريدونو د څېړنې لپاره دې د ملګرو ملتونو له لوري يو حقيقت موندونکي پلاوی اېجاد شي.
د افغانستان بشري حقونو خپلواک کمېسيون ټينګار کړی چې حکومت هم بايد د دې غوښتنې د ملاتړ ترڅنګ د نوموړي پلاوي د ايجاد او څېړنې په برخه کې همکاري وکړي.
د افغانستان بشري حقونو خپلواک کمېسيون داسې مهال دغه غوښتنه کوي چې په کابل کې د هدفي وژنو د دوام ترڅنګ په ګڼو ولايتونو کې جګړه دوام لري او په ترڅ کې يې جنګي قوانېن نقض کېږي.
