رویداد خبري آژانس په افغانستان کې لومړنۍ دیجټلي خبري آژانس
د رئيسالوزرا لومړی مرستيال عبدالغني برادر وايي، اوسني امنيتي وضعيت ته په پام سره اړتيا ده چې په افغانستان کې لويې ملي پروژې تطبيق شي.
نوموړي نن چهارشنبه د (وري په ۱۰مه) په بلخ کې د قوشتېپې د اوبو لوی کانال د پرانيستې مراسمو ته وويل، افغانستان د نورو هېوادونو خوراکي او نورو لنډمهاله مرستې ته اړتيا نه لري، خو په خبره يې مشروط پر دې چې په افغانستان کې د قوشتېپې کانال په څېر لويې بنسټيزې پروژې پلي شي.
برادر زياته کړه، چې د ياد کانال په بشپړېدو سره به افغانستان د غلې دانې په برخه کې پر ځان بسيه شي. د نوموړي په خبره، د وخت په تېرېدو او يادې پروژې په پشپړېدو سره به د قوشتېپې کانال اړوند ځمکو کرنيزو محصولاتو د ملاتړ په موخه، د پروسيس فابرېکې هم جوړې کړي.
برادر دغه راز زياته کړه چې د ورته لويو ملي پروژو په پلي کولو سره بهر ته د افغانستان کاري بشري ځواک له تګ هم مخنيوی کېدای شي او زياتوي چې حکومت د کاري فرصتونو رامنځته کولو ته ژمن دی.
د قوشتېپې کانال د هېواد په کچه يو له لويو پروژو څخه ده، چې د بلخ له کلدارې ولسوالۍ څخه پيل او د فارياب تر ميمنې ښار رسدلی دی. دغه کانال ټولټال ۲۸۵ کيلومټره اوږدوالی لري او د ۵ کلونو په ترڅ کې به يې چارې بشپړ شي.
