رویداد خبري آژانس په افغانستان کې لومړنۍ دیجټلي خبري آژانس
د«حال وش»په نامه د ایران د بشري حقونو یو سازمان خبر ورکړی چې ایراني حکومت د زاهدان په زندان کې یو افغان اعدام کړی دی.
یاد سازمان(یکشنبې، د لړم ۲۰مه) په یوه اعلامیه کې ویلي، چې اعدام شوی افغان محمد نبي پاپل زهي نومېږي ۲۸ کلن دی او د ایران حکومت د نشه یي توکو د قاچاق په تور اعدام کړی دی.
د دغه سازمان د معلوماتو له مخې سږکال په ایران کې د اعدامونو لړۍ چټکه شوې او په ځانګړي ډول په زاهدان کې د دغه افغان په اعدام سره تر دې دمه د اعدام شویو افغانانو شمېر ۵۰ ته رسېدلی دی.
که څه هم د بشر حقونو نړیوال سازمان او نورو بنسټونو له ایراني حکومت د اعدامونو د لړۍ د دریدو غوښتنه کړې وه، خو له دې هر څه سره سره بیا هم په دغه هېواد کې زندانیان د بېلابېلو جرمونو په تور اعدامېږي.
