رویداد خبري آژانس په افغانستان کې لومړنۍ دیجټلي خبري آژانس
د راپورو له مخې په هېواد کې امریکايي سرتیري کندهار په ژیړی ولسوالۍ کې پر طالبانو هوايي برید کړی.
د امریکايي سرتیرو ویاند سوني لګیت ویلي چې دا برید د افغان امنتي ځواکونو د دفاع په خاطر شوی.
طالبانو دا برید په دوحه کې د امریکا او طالبانو ترمنځ د شوې هوکړې څخه سرغړونه یادوي، خو د امریکايي سرتیرو ویاند لګیت وايي دا هوايي برید د امریکا او طالبانو د تړون سره سم شوی.
له دې وړاندې هم امریکايي ځواکونو په وردګو کې د افغان امنیتي سرتیرو په ملاتړ پر طالبانو هوايي بریدونه کړي و.
دا په داسې حال کې ده چې د قاطع ملاتړ سرتیرو مشر سکاټ میلر طالبانو ته خبرداری ورکړی و چې که تاوتریخوالی کم نه کړي، پر ضد به یې اقدام وشي.
په افغانستان کې مېشت امریکايي سرتیرو ویلي هر کله چې طالبانو پر افغان امنیتي ځواکونو برید وکړي، ورته بریدونه به پرې وشي.
د طالبانو له لوري بریدونه په داسې حال کې کیږي چې په دوحه کې د افغان حکومت او طالبانو د استازو ترمنځ د سولې په خبرو کې پرمختګ شوی.
