رویداد خبري آژانس په افغانستان کې لومړنۍ دیجټلي خبري آژانس
د امریکا د ملي امنیت شورا ویاند وایي چې هېواد یې په دمشق کې د ایران پر قونسلګرۍ په برید کې لاس نه درلود. له همدې امله د ایران د بهرنیو چارو د وزیر هغه څرګندونې، چې له امریکا سره باید حساب وشي، «بې اساسه» دي.
د سپینې ماڼۍ د ملي امنیت شورا ویاند، جان کربي پرون سې شنبې د وري ۱۴مه په یوه خبري غونډه کې ویلي چې د سوریې په دمشق کې د ایران په قونسلګرۍ باندې د اسراییلو په منسوب برید کې واشنګټن لاس نه لري.
دا په داسې حال کې ده چې په دمشق کې د ایران سفارت ته څېرمه پر یوې ودانۍ د توغندیزو بریدونو له امله د قدس ځواک د ۷ جګپوړو قوماندانانو او غړو په ګډون ۱۱ کسان ووژل شول.
بلخوا د ایران اسلامي جمهوریت د سې شنبې په ورځ اعلان وکړ چې دوی به له اسراییلو څخه د هغه برید غچ واخلي چې د سوریې په پلازمینه کې یې د دوی د سفارت ځینې برخې ویجاړې کړې دي.
خو اسراییلو بیا تر اوسه د دې برید پړه نه ده منلې.
