رویداد خبري آژانس په افغانستان کې لومړنۍ دیجټلي خبري آژانس
د امریکا د دفاع وزیر، لویډ استین له اوکراین سره د ۱۲۵میلیون ډالر نظامي مرستې د ځانګړې کېدو خبر ورکړی دی.
دا پرېکړه پرون (جمعه د وږي ۲مه) له اوکرایني سیال، رستم عمروف سره د استین له خبرو اترو وروسته وشوه.
په ورته وخت کې د امریکا ولسمشر، جو بایډن د اوکراین له ولسمشر، ولادیمیر زلنسکي سره په ټلفوني اړیکه کې له کییف څخه د واشنګټن په پیاوړي ملاتړ ټینګار کړی دی.
د رویټر خبري اژانس د راپور او سپینې ماڼۍ د بیانیې له مخې چې په دې بسته کې د هوایي دفاع توغندي، د توغندیو ضد تجهیزات او نورې وسلې شاملې دي.
زلنسکي د امریکا له دې مرستې د هرکلي ترڅنګ د هوایي دفاع سیسټم په پیاوړتیا ټینګار کړی او زیاته کړې یې ده: “اوکراین د دې بستې ډېرو وسلو ته په ځانګړې توګه د هوایي دفاع سیسټم په برخه کې د ښارونو د ساتنې لپاره اړتیا لري.”
دا نظامي مرسته د اوکراین د خپلواکۍ د ورځې په مناسبت نن (شنبې، د وږي ۳مه) اعلان شوې ده.
د راپورونو له مخې، امریکا د اوکراین پر وړاندې د روسیې د جګړې له پیل راهیسې له کییف څخه د ملاتړ په موخه څه باندې ۵۰ میلیارډ ډالر نظامي مرسته کړې ده.
