رویداد خبري آژانس په افغانستان کې لومړنۍ دیجټلي خبري آژانس
د امريکا بهرنيو چارو وزارت خبر ورکړی، چې په دوحې کې د طالب او امريکايي چارواکو ترمنځ پر بېلابېلو موضوعاتو خبرې شوي دي.
د امريکا بهرنيو چارو وزارت وياند نېډ پرايس خبريالانو ته ويلي، چې د افغانستان لپاره د امريکا ځانګړي استازي توماس ويسټ له طالب چارواکو سره په دوحې کې پر بېلابېلو موضوعاتو خبرې کړي، چې د نوموړي په خبره په افغانستان کې له ترهګرۍ سره مبارزه د يادو موضوعاتو له ډلې يوه عمده هغه وه.
نېډ پرايس په کابل کې د امريکايي ډرون په وسيله د القاعده شبکې مشر ايمن الظواهري وژلو ته هم اشاره کړې او ويلي يې دي، چې طالبانو په کابل کې الظواهري ته د پناه په ورکولو سره د دوحې هوکړه نقض کړې ده.
که څه هم د افغانستان سرپرست حکومت تر اوسه په کابل کې د الظواهري د وژل کېدو خبر رد او تائيد کړی نه دی؛ خو په ډاګه کړې يې ده چې د امريکا د بېپيلوټه الوتکې ياد بريد د دوحې هوکړې خلاف عمل دی.
