رویداد خبري آژانس په افغانستان کې لومړنۍ دیجټلي خبري آژانس
د افغانستان د کرکټ الف لوبډلې «افغان ابدالیان» د درې اړخیزې لوبلړۍ په لومړۍ لوبه کې هانګ کانګ لوبډلې ته د ۷ وېکټو په توپير ماتې ورکړې ده.
دا لوبه (یکشنبې، د تلې ۲۲مه) ترسره شوه چې پکې هانګ کانګ لومړۍ توپوهنه وکړه او افغان ابدالیانو ته یې د ۱۱۲ منډو هدف وټاکه.
افغانستان دا هدف په ۱۴ اورونو کې پوره کړ او لوبه یې وګټله.
د دې شل اوریزه لوبې غوره لوبغاړی کریم جنت شو، نوموړي په توپ اچونې کې د هانګ کانګ درې لوبغاړي وسوځول او دغه راز په توپوهنې کې ۴۷ منډې وکړې.
ټاکل شوې ده چې د افغانستان د کرکټ الف لوبډله به نن (دوشنبه،تلې۲۳مه) د کابل پر وخت ماسپښین مهال د درې اړخیزو سیالیو په لړ کې له کوربه عمان سره سیالي وکړي.
افغان کرکټ بورډ ویلي، د دې سیالیو موخه د اسیا ایمرجینګ سیالیو لپاره چمتووالی دی، چې د اکټوبر په ۱۸مه نېټه به په عمان کې ترسره شي.
