رویداد خبري آژانس په افغانستان کې لومړنۍ دیجټلي خبري آژانس
ملګري ملتونه وایي چې افغان مېرمنې او نجونې باید د ژوند په ټولو برخو کې په اغېزمنه او بشپړه توګه ګډون ولري.
ملګرو ملتونو په خپله اېکس پاڼه لیکلي چې انتونیو ګوترش، د تېرې اوونۍ د دوحې په غونډه کې یو ځل بیا د افغان نجونو او ښځو د زدکړو ځنډېدو پر پرېکړې د بیاکتنې غوښتنه کړې ده.
له بلې خوا، په افغانستان کې د چین ځانګړی استازي، یوشیائونګ په خپله اېکس پاڼه لیکلي چې د دوحې په غونډه کې یې په افغانستان کې د معتدلې حکومتولۍ پر جوړښت او د ښځو او نجونو د زدکړو پر پیلېدو ټینګار کړی دی.
د هغه په وينا، په دې ناسته کې چين او يو شمېر نورو هېوادونو د افغانستان په بيارغونه کې د امريکا پر اصلي مسووليت، د يو اړخيزو بنديزونو په لرې کولو او د مرکزي بانک د بهرنيو اسعارو د زېرمو پر خلاصون ټينګار کړی دی.
د دوحې غونډه د همدې میاشتې په ۱۸ او ۱۹ مه د ملګرو ملتونو د عمومي منشي، انتونیو ګوترش په کوربهتوب د ۲۷ هېوادونو او نړیوالو بنسټونو د استازو په حضور کې وشوه.
بلخوا د ا.ا مسوولانو د دوحې په غونډه کې ګډون نه و کړی او دا غونډه یې بې پایلې بللې ده.
