رویداد خبري آژانس په افغانستان کې لومړنۍ دیجټلي خبري آژانس
د افغانستان بهرنيو چارو وزارت وياند حفيظ احمد ضياء خبر ورکړی، چې د بهرنيو چارو وزارت سرپرست اميرخان متقي ازبکستان ته د خپل سفر په ترڅ کې د دې هېواد ولسمشرۍ د چارو ادارې له رئيس سردار عمرزاکوف سره ليدلي.
د نوموړي په خبره، دواړو لوریو د افغانستان او ازبکستان پر دوه اړخیزو اړیکو، ټرانزیټ، د کرنې په سکټور کې پر همکاریو او د ازبکستان، افغانستان او پاکستان ترمنځ د اورګاډي پټلۍ پروژې د کار د پیل په باب خبرې کړي.
حفيظ احمد زياته کړې، چې په ليدنه کې د افغانستان اورګاډي پټلۍ متخصصینو د نقشې جوړولو او د سروې ترسره کولو په اړه چمتووالی وښود؛ خو په خبره يې د ازبکستان د چارو ادارې رئیس عمرزاکوف بيا ډاډ ورکړی، چې د دې اوونۍ له پیل سره سم به د افغانستان په خاوره کې د يادې پروژې د سروې چارې هم پیل شي.
نوموړي ويلي، د افغانستان د کرنې سکټور د اصلاح لپاره به د خپلو مرستو ترڅ کې د کرنيزو ناروغیو او مالدارۍ د درملنې لپاره به، په افغانستان کې پر امکانات سمبال کلینیکونه جوړ کړي.
د بهرنيو چارو سرپرست وزير اميرخان متقي د افغانستان په اړه د تاشکند په نړيوال کنفرانس کې د ګډون په موخه تېره اوونۍ ازبکستان ته تللی او لا هم هماغلته د دې هېواد له چارواکو او له تاريخي ځايونو څخه په ليدنه بوخت دی.
