رویداد خبري آژانس په افغانستان کې لومړنۍ دیجټلي خبري آژانس
ټاکل شوې نن د افغانستان کرکټ ملي لوبډله د جنوبي افريقا له لوبډلې سره تمريناتي يا (وارم اپ) لوبه وکړي. د کرکټ بورډ د مالوماتو له مخې، دغه لوبه به د افغانستان پر وخت نن ماسپښين دوې نيمې بجې د شېخ ذاهد په لوبغالي کې پيل شي.
چارواکو ويلي چې د نړيوال شل اووريز جام لوبو لپاره د کرکټ ملي لوبډله پوره چمتووالی لري او راشد خان هم چې د هند په سوداګريزو لوبو کې بوخت و، له ملي لوبدلې سره يو ځای شوی دی.
ټاکل شوې چې د راتلونکې چهارشنبې په ورځ هم د کرکټ ملي لوبډله له ويسټاينډيز سره تمريناتي لوبه وکړي. د کرکټ نړيوالې شورا له لوري د ترتيب شوي مهالوېش پر بنسټ، په نړيوال شل اووريز جام کې د افغانستان رسمي لوبه د روانې اکټوبر په ۲۵مه پلان شوې، خو تر اوسه يې سياله لوبډله نه ده مشخص شوې.
د کرکټ شل اووريز نړيوال جام لوبې دا وار په عربي متحده اماراتو او عمان هېوادونو کې ترسره کېږي.
