رویداد خبري آژانس په افغانستان کې لومړنۍ دیجټلي خبري آژانس
د احصایې او معلوماتو ملي ادارې په متحده عربي اماراتو کې میشتو افغانانو ته د الکټرونیکي پېژندپاڼو د وېش د بیا پیل په موخه ابوظبۍ ښار ته یو ټیم استولی دی.
دې ادارې د یکشنبې په ورځ (د چنګاښ۱۰مه) ویلي چې په ابوظبۍ ښار کې به د برېښنايي پېژندپاڼو د وېش یو مرکز فعال کړي او هلته به مېشتو افغانانو ته د برېښنايي پېژندپاڼو د ترلاسه کولو په برخه کې ډېرې اسانتیاوې برابرې کړي.
ټاکل شوې چې د احصایې او معلوماتو د ملي ادارې ماموریت په راتلونکو څو ورځو کې په ابوظبۍ کې د الکټرونیکي پېژندپاڼو د وېش بهیر پیل کړي.
د دې ادارې مشر، فقیر محمد زیار ویلي: “زموږ هڅه دا ده، چې په هېواد کې دننه او بهر زموږ ټول هېوادوال په اسانۍ سره الکټرونیکي پېژندپاڼې ترلاسه او له ګټو یې برخمن شي.”
د ملي احصایې ادارې مسوولین وايي، په بهر کې د الکټرونیکي پېژندپاڼو د وېش مرکزونه د ۱۴۰۲ کال د سلواغې په میاشت کې له بهرنیو چارو وزارت سره د لاسلیک شوي تفاهم لیک پر بنسټ جوړېږي.
دوی دا هم ویلي چې په ايران او نورو هېوادونو کې به هم ډېر ژر د پېژندپاڼو د وېش مرکزونه فعال شي.
