رویداد خبري آژانس په افغانستان کې لومړنۍ دیجټلي خبري آژانس
د افغانستان يو شمېر ګاونډي هېوادونه چې پرون چهارشنبه د (لړم ۵مه) د ايران په پلازمېنه تهران کې سره جرګه شوي وو، پر دې موافقې ته رسېدلي چې په افغانستان کې د ګډ او ټولشموله حکومت رامنځته کول يوه اړتيا ده.
دې هېوادونو په يوه خوله له اسلامي امارت غوښتي چې ژر تر ژره په افغانستان کې د ثبات په موخه داسې حکومت جوړ کړي د دغه هېواد ټول اقشار په کې برخه ولري.
له دې سره د تهران يادې غونډې ته د روسيې بهرنيو چارو وزير سرګي لاوروف د سيمې له هېوادونو غوښتي چې د امريکا او ناټو ځواکونو ته په خپله خاوره کې ځای ور نه کړي.
نوموړي ويلي، له افغانستان څخه د امريکايي او ناټو تر وتلو وروسته، اوس دغه ځواکونه غواړي چې د سيمې په کوم بل هېواد کې ځان مېشت کړي، خو په خبره يې په سيمه کې يادو ځواکونو ته د مېشت کېدو ځای نشته.
لاوروف ويلي چې له افغانستان څخه د کډوالۍ جريان ته هم بايد معقول پای پيدا شي؛ ځکه د نوموړي په خبره دا مهال له دغه هېواد څخه يو شمېر داسې عناصرو چې له ترهګرۍ سره تړاو لري، د افغانستان ګاونډيو هېوادونو ته تګ پيل کړی دی.
د افغانستان په تړاو د تهران غونډه پرون چهارشنبه ترسره شوه چې په کې ترکمنستان، ازبکستان، تاجکستان او پاکستان بهرنيو چارو وزيرانو حضور درلود او دغه راز د چين او روسيې بهرنيو چارو وزيرانو بيا په انلاين ډول په ياده غونډه کې برخه لرله.
