رویداد خبري آژانس په افغانستان کې لومړنۍ دیجټلي خبري آژانس
پاکستانۍ ډان ورځپاڼې په ملګرو ملتونو کې د دغه هېواد دايمي استازي منير اکرم په حواله راپور ورکړی، چې پاکستان د افغانستان سرپرست حکومت په رسميت پېژندلو ته هغه مهال تيار دی، څو په دې اړه سيمهييزه اجماع رامنځته شي.
منير اکرام د ملګرو ملتونو د امنيت شورا په غونډه کې ويلي، په افغانستان کې د يومانا ماموريت دوام ښه پرېکړه ده او په خبره يې، ملګري ملتونو خپل اړوند مسايل له دې لارې د افغانستان له سرپرست حکومت سره همغږي کولی شي.
منير اکرم داسې مهال د افغانستان سرپرست حکومت د رسميت پېژندلو بحث مطرح کړی، چې تازه د نوموړي سازمان سياسي استازولۍ يا يوناما ماموريت په افغانستان کې يوه کال لپاره تمديد شو.
ډان ورځپانې په دې اړه خپل راپور کې ياده کړې، چې د چين په کوربتهتوب د افغانستان په اړه د سيمې هېوادونو راتلونکې غونډې د بحث عمده موضوع به، د افغانستان حکومت په رسميت پېژندل وي.
دا غونډه ټاکل شوې چې په راتلونکي اپرېل کې ترسره شي او په کې به د چين، ايران، تاجکستان، پاکستان، ازبېکستان، ترکمنستان بهرنيو چارو وزيران او د طالبانو استازی هم ګډون وکړي.
په افغانستان کې د اسلامي امارت واک ته له رسېدو ۷ مياشتې تېرېږي، خو تر اوسه د هېڅ کوم هېواد له لوري يې سرپرست حکومت په رسميت نه دی پېژندل شوی.
