رویداد خبري آژانس په افغانستان کې لومړنۍ دیجټلي خبري آژانس
د خيبر پښتونخوا په پاس يا بره دير کې پر پاکستاني پوځيانو خونړۍ چاودنه شوې او په کې يادو پوځيانو ته درنه مرګ ژوبله اوښتې ده.
ځايي چارواکو ويلي دا چاودنه داسې مهال شوې، چې يوه ډله پوځيان د پاس دير په نصرت دره کې يوې چينې ته د اوبو وړلو په موخه پر لار وو، چې چاونه پرې وشوه.
د دوی په خبره په دې چاودنه کې ۳ پوځيان وژل شوي او يو بل ټپي شوی دی؛ خو ځايي سرچينو له رسنيو سره په خبرو کې د يادې پېښې د مرګ ژوبلې شمېرې له دې لوړې ښودلي دي.
په خيبرپښتونخوا کې د پاکستان امنيتي مسوولانو ويلي، چې د پاس دير نصرت دره د ډيورنډ پر کرښه د افغانستان کونړ ولايت ته څېرمه پرته ده.
د پاکستان پوځ تر اوسه د دې چاودنې په اړه څه نه دي ويلي او نه هم تر اوسه کومې وسلهوالې ډلې د دې چاودنې مسووليت په غاړه اخيستی دی.
په دې وروستيو کې په خيبر پښتونخوا او قبايلي سيمو کې د ناامنۍ زياتېدو راپورونه ورکړل شوي او په دې ترڅ کې داسې راپورونه هم خپاره شوي، چې تحريک طالبان پاکستان وسلهوال يو وار بيا د سوات غرونو کې ګڼ شوي دي.
ځايي امنيتي مسوولانو هم تائيد کړې چې په سوات کې د تحريک طالبان پاکستان ډېری وسلهوال ددې سيمې غرونو ته ورغلي او تحرکات يې پيل کړي دي.
