رویداد خبري آژانس په افغانستان کې لومړنۍ دیجټلي خبري آژانس
په افغانستان کې د اروپایي ټولنې استازي اعلان کړی چې ۲۰۰زره یورو، چې ۱۵.۵ میلیونه افغانۍ کېږي، د افغانستان له سېلاب ځپلو سره د بېړنیو بشري مرستو لپاره ځانګړې کړې دي.
اروپايي ټولنې پرون دوشنبې د غبرګولي ۷مه په خبرپاڼه کې ویلي چې دا پیسې د افغانستان لوېدیځ، شمالي او شمال ختیځو سیمو کې د ۲۸زره سېلاب ځپلو لپاره ځانګړې شوې دي.
د اروپایي ټولنې استازي دا هم ویلي چې دا پیسې به د روغتیا او سرپنا او د دوی د ورځنیو اړتیاوو د پوره کولو په برخه کې مصرف شي.
اروپایي ټولنې د روانې میلادي میاشتې په ۲۱مه نېټه اعلان کړی چې په افغانستان کې له سېلاب ځپلو سره ۴۰۰زره یورو مرسته کوي.
دا په داسې حال کې ده چې سږ پسرلی د هېواد په ډېرو سیمو کې سیلابونو هېوادوالو ته ځاني او درانه مالي زیانونه واړول.
دغو سېلابونو په بغلان، غور، تخار، فاریاب او بدخشان ولایتونو کې تر ټولو ډېر زیانونه اړولي دي.
