خبرگزاری رویداد اولین خبرگزاری دیجیتلی در افغانستان
محمد حنیف اتمر وزیر امور خارجه به تاجیکستان رفت
پنجشنبه27سنبله1399:
محمد حنیف اتمر سرپرست وزارت امور خارجهٔ جمهوری اسلامی افغانستان بنابر دعوت رسمی وزیر خارجهٔ تاجیکستان، در رأس یک هیأت بلند پایهٔ دولتی برای یک سفر دو روزه امروز ۲۷ سنبله ۱۳۹۹ عازم شهر دوشنبه – پایتخت جمهوری تاجیکستان گردید.
وزارت امور خارجه با نشر خبرنامه ی گفته است که در این سفر رسمی، قرار است آقای اتمر با آقای امام علی رحمان رئیس جمهوری، قاهر رسول‌زاده صدراعظم، سراج‌الدین مهرالدین وزیر خارجه، و سید مؤمن یتیم‌اوف رئیس کمیتهٔ دولتی امنیت ملی تاجیکستان دیدار و گفتگو کند. بحث‌ها و مذاکرات روی تقویت هرچه بیشتر روابط دو کشور در بخش‌های امنیتی و سرحدی، ترانسپورت، سرمایه‌گذاری، تجارت و ترانزیت، و انرژی متمرکز خواهند بود.
سرپرست وزارت امور خارجه را در این دیدار رسمی شماری از مقامات دولتی، والیان و اعضای پارلمان همراهی می کنند.
