رییس جمهور تاجکستان :از تلاش‌های صلح و برقراری ثبات در افغانستان حمایت می‌کنیم

سه شنبه2جدی1399:

رییس شورای عالی مصالحه‌ی ملی قبل از ظهر امروز با  امام علی رحمان رییس جمهور تاجیکستان ملاقات کرد.

رییس جمهور تاجیکستان در این ملاقات تشریف‌آوری دکتور عبدالله عبدالله رییس شورای عالی مصالحه‌ی ملی را به جمهوری تاجیکستان خوش آمدید گفت و ابراز امیدواری نمود که تلاش‌های صلح تحت رهبری او در افغانستان به پیروزی برسد.

رییس جمهور، افغانستان را از دوستان و متحدان نزدیک تاجیکستان خواند و تاکید نمود که این روابط ریشه در همسایگی، مشترکات تاریخی، فرهنگی و دینی دارد.

امام علی رحمان با اعلان حمایت همه جانبه‌ی جمهوری تاجیکستان از تلاش‌های صلح در افغانستان، صلح و ثبات در افغانستان را صلح و ثبات در تاجیکستان، منطقه و فراتر از منطقه خواند. رییس جمهور تاجیکستان در ادامه‌ی صحبت‌های خود افزود که افغانستان، تاجیکستان و منطقه از دهشت‌افگنی، افراط‌گرایی و بی‌ثباتی متضرر شده‌اند و صلح و ثبات در افغانستان زمینه‌ی گسترش و توسعه‌ی تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم می‌سازد.

رییس جمهور تاجیکستان در بخش دیگر از صحبت‌های خود گفت که تاجیکستان دوست و متحد افغانستان است و از تلاش‌های صلح در افغانستان و تصمیم جمهوری اسلامی و مردم افغانستان در این عرصه حمایت می‌کند.

دکتور عبدالله عبدالله رییس شورای عالی مصالحه‌ی ملی با تشکر از دعوت رییس جمهور، از استقبال و میزبانی حکومت و مردم تاجیکستان قدردانی نمود. رییس شورای عالی مصالحه‌ی ملی در ادامه‌ی صحبت‌های خود افزود که روابط و دوستی میان دو کشور بر ارزش‌ها و مشترکات تاریخی، فرهنگی و دینی دیرینه استوار است و از حمایت و همکاری‌های شما از داعیه‌ی برحق مردم افغانستان در دوره‌های مختلف سپاس‌گزاریم.