د ننګرهار د کرنې، اوبولګولو او مالدارۍ ریاست چارواکي وایي چې په دغه ولایت ۸۲۵ بېوزله مېرمنو ته د ځان بساينې او اقتصادي پیاوړتیا په موخه د کرنې او کرنیزو محصولاتو د پروسس په برخه کې د کاري زمينه یې ورته برابره کړې ده.

د ننګرهار د کرنې ریاست وایي، چې پر یادو مېرمنو د کورنیو باغچو او شنوخونو د جوړولو اړوند توکي، د سبو تخمونه، د مالدارۍ محصولاتو د پروسس او بسته بندۍ توکي وېشل شوي دي او ترڅنګ یې یوشمېر مېرمنو ته د روب، اچار او مرباو جوړولو مرکزونه جوړ او دوی ته د یادو توکو د جوړولو لارې چارې هم ښودل شوي دي.

یاد ریاست دغه راز زیاتوي چې مېرمنو ته د ځمکنې توتانو ننداریزې کروندې هم جوړې شوي دي، ترڅو دوی په خپلو کورونو کې په کار بوختې شي او د خپلې کورنۍ اړتیاوې ورڅخه پوره کړي.
د دغه ریاست د چارواکو په وینا د یاد ریاست له خوا د اچین او دوربابا په ولسوالیو کې ۱۰۰ بېوزله مېرمنو ته د سبو او مېوو لمریز وچوونکي دستګاوې او د سبو او مېوو د پروسس اړینې توکي ورکړل شوي دي او ترڅنګ یې یادې مېرمنې د سبو او مېوو د پروسس په برخه کې روزل شوې هم دي.