رویداد خبري آژانس په افغانستان کې لومړنۍ دیجټلي خبري آژانس
د افغانستان د ملي امنیت شورا ویاند رحمت الله اندړ وایي، وسله والو طالبانو له افغانستانه د بهرنیو سرتیرو د وتلو د پروسې له پیله ۱۴۵۵ بریدونه کړي دي.
رحمت الله اندړ نن شنبه (د غبرګولي ۱۵مه) په ټویټر کې لیکلي، افغان امنیتي او دفاعي ځواکونو د ۶۳ وسله والو جګړو او چاودنو مخنیوی کړی دی.
اندړ ادعا کړې چې طالبانو یوازې تېره اوونۍ په ۲۷ ولایتونو کې د ښځو او ماشومانو په ګډون ۶۳ ملکیان وژلي او ۱۲۶ نور ټپیان کړي دي.
رحمت الله اندړ زیاتوي، طالبانو له واشنګټن سره له موافقې وروسته د بین الافغاني مذاکرو پر پرمختګ د تمرکز پرځای جګړې ته کار ویلی دی.
بل خوا د وسله والو طالبانو یوه ویاند ذبیح الله مجاهد په خپل ټویټر کې له پرون راهیسې په میدان وردګ، جوزجان، نورستان، بغلان، دایکنډي، زابل او نورو ولایتونو کې د ځینو پوستو د نیولو او د ګڼو افغان پوځیانو د وژلو ادعا کړې ده.
په افغانستان کې د سولې له هڅو سره- سره د جګړې ښکېل لوري یوه او بل ته د جګړې په ډګرونو کې د درنې مرګژوبلې اړولو ادعا کوي.
