رویداد خبري آژانس په افغانستان کې لومړنۍ دیجټلي خبري آژانس
د پاکستان په پارلمان کې د دغه هېواد د تحريک انصاف په مشرۍ د اوسني حکومت سياسي مخالفانو جبهه تشکيل کړې او هڅه کوي چې د عمران اوسنی حکومت له سياسي لارو را وپرځوي.
د لومړي وزير عمراخان د حکومت په مخالفو سياسي ګوندونو کې د خلکو ګوند (پپلز پارټي) د مسليم ليګ ن، جمعيت علماء اسلام او يو شمېر نور هغه ګوندونه چې په پارلمان کې ونډه لري، شامل دي.
د مخالفو سياسي ګوندونو دغه جبهه د مارچ په اتمه تشکيل شوې او مشرانو يې يوه خبري کنفرانس ته ويلي، چې په پارلمان کې له عمران خان او د هغه له ګوند څخه د باور رايې بېرته اخيستو لپاره له نېمايي زياتې رايې لري.
دوی زياته کړې چې د مخالفونو ګوندونو پر غړو سربېره، په پارلمان کې د يو شمېر هغو ګوندونو استازي هم ورسره ځای شوي چې له دې وړاندې له عمران خان سره د حکومت جوړولو په اېتلاف کې شامل وو.
له دې سره عمران خان هم د خپل اېتلاف شاملو ګوندونو له مشرانو سره لېدنې پيل کړي او ويلي يې دي، چې په پارلمان کې به د عدم اعتماد پرمهال له خپلې مخالفې جبهې سره کلکه مبارزه وکړي.
د عمران خان مخالفه جبهه د نوموړي لرې کولو لپاره د پارلمان له ۳۴۲ ټولو رايو څخه ۱۷۱ رايوو ته چې د عمومي نصاب نېمايي کېږي، اړتيا لري.
