رویداد خبري آژانس په افغانستان کې لومړنۍ دیجټلي خبري آژانس
نن سېشنبه د (سلواغې ۲۶مه) له افغانستان څخه د پخواني شوروري اتحاد ځواکونو د وتلو له ۳۳مې کليزې سره برابره ده.
اسلامي امارت په دې اړه د يوې اعلاميې په خپرولو سره ويلي، افغانانو تل په ځان کې د خپلواکۍ حس په خورا قووت سره ساتلی دی او د خپلواکۍ ساتنې لپاره کلک هوډ لري.
په اعلاميه کې زياته شوې چې افغانانو په تېر کې هم د سولې بې سارې فرصتونه لرل؛ خو د اعلاميې په حواله ياد فرصتونه ترې د ځينو هېوادونو له لوري د يرغل په کولو سره اخيستل شوي دي.
اعلاميه کې دغه راز ويل شوي چې اسلامي امارت پر هېڅ کوم هېواد د يرغل نيت نه لري او ټينګار يې کړی چې له نورو هېوادونو هم پر متقابل احترام ولاړ د امن په فضا کې د ژوند کولو تمه لري.
اسلامي مارات په خپله دې اعلاميه کې اشاره کړې چې خلک دې په راتلونکي کې هم د هر ډول طويو او دسيسو پر وړاندې حساس و اوسي او د اسلامي تعهد له مخې دې د خپل هېواد خپلواکي وساتي.
شوروي اتحاد په افغانستان کې د خپل ملاتړي نظام د ټينګولو په موخه د ۱۳۵۸ لمريز کال د مرغومي په ۶مه په ټانکونو او نورو پوځي تجيزات سمبالې پوځي ډلګۍ د حيراتان بندر له لارې افغانستان ته دننه کړې.
دا کار د افغانستان د خلکو له غبرګون او مقاومت سره مخ شو، چې بلاخره تر اوږدې جګړې وروسته د شوروي اتحاد ځواکونو وروستۍ ډلګۍ د ۱۳۶۷ لمريز کال د سلواغې په ۲۶مه له افغانستان څخه بېرته ووته.
