رویداد خبري آژانس په افغانستان کې لومړنۍ دیجټلي خبري آژانس
په قبايلي سيمو او پښتونخوا کې د پاکستان د حکومت ضد فعالې وسلهوالې ډلې تحريک طالبان پاکستان يا TTP تائيد کړه چې د يادې ډلې مهم غړی خالد بلتي وژل شوی دی.
خالد بلتي چې ويل کېږي د تحريک طالبان پاکستان ډلې وياند دی، پر محمد خراساني مشهور او د پاکستان ضد يو لړ لويو بريدونو کې يې لاس درلود.
تحريک طالبان پاکستان په دې اړه نن پنجشنبه د يوې اعلاميې په خپرولو سره ويلي، چې دې ډلې يو ديني عالم او د سیاسي چارو پوه له لاسه ورکړی؛ خو د وژل کېدو څرنګوالي په اړه يې جزيات نه دي ورکړي.
د پاکستان ډان ورځپاڼې د پاکستان د پوځ يوې سرچينې په حواله خبره ورکړی، چې د خالد بلتي جنازه د تېرې سېشنبې په ورځ د افغانستان په کونړ ولايت کې شوې او هماغلته خاورو ته هم سپارل شوی دی.
اسلامي امارت په دې اړه تازه رسنيو ته څه نه دي ويلي؛ خو له دې وړاندې يې خبر ورکړی و چې د خالد بلتي د وژل کېدو په اړه څېړنې کوي.
