رویداد خبري آژانس په افغانستان کې لومړنۍ دیجټلي خبري آژانس
د افغانستان لپاره برېتانيا شارزدافېر هوګو شارټر وايي، په افغانستان کې د بشري وضعيت په اړه د بحث په موخه يې پرون يکشنبه د (سلواغې په ۱۰مه) په قطر کې د طالبانو سياسي دفتر له ځينو مسوولانو سره لېدلي دي.
نوموړي په دې اړه خپل ټوېټر کې لېکلي، په ياده لېدنه کې د افغانستان پر بشري وضعيت سربېره د ترهګرۍ، بشري حقونو او دغه راز ښوونځيو ته د نجونو د بېرته ستنېدو پر اړتيا بحث او خبرې وشوې.
په ورته وخت کې شارټر ډاډ ورکړی چې برېتانيا به په موجوده بشري وضعيت کې له افغانانو خپل ملاتړ ته دوام ورکړي.
د افغانستان بشري وضعيت په اړه د نوموړي څرګندونې داسې مهال دي، چې پرون يکشنبه د ملګرو ملتونو عمومي منشي انتونيو ګوټيريش هم په دې اړه د اندېښنې څرګندولو ترڅنګ، پر هېوادونو غږ کړی چې په افغانستان کې د بشري ناورين مخنيوي په موخه سملاسي لاس په کار شي.
