رویداد خبري آژانس په افغانستان کې لومړنۍ دیجټلي خبري آژانس
کابل ته له تحريک طالبان پاکستان يا TTP سره د مذاکراتو په موخه د روانې اوونۍ په پيل کې د راغلي پلاوي مشر محمد علي سيف وايي، چې د امريکا له لوري د القاعده شبکې مشر ايمنالظواهري وژل به د پاکستان او يادې ډلې ترمنځ د سولې پر مذاکراتو منفي اغېز ونه کړي.
نوموړي پرون چهارشنبه د (زمري په ۱۲مه) مشال راډيو ته ويلي، چې لا هم په سيمه کې جګړهييز حالت حاکم دی او په راتلونکي کې هم د ورته هر ډول پېښو احتمال شته.
د سيف په خبره، يادې پېښې نه شي کولی چې د پاکستان حکومت او په قبايلي سيمو کې د فعالي تحريک طالبان پاکستان ډلې ترمنځ د سولې په مذاکراتو کې خنډ او ځنډ ارمنځته کړي.
نوموړي ويلي، چې د يادو مذاکراتو ترڅنګ د پاکستان مرکچي پلاوي عمده هدف دا هم دی، چې د پاکستان او افغانستان ترمنځ هغه بدګوماني له منځه يووسي، کوم چې د جګړې لامل شوي دي.
د تېرې يکشنبې په ورځ هغه مهال چې امريکايي ډرون الوتکې په کابل کې دالقاعده شبکې مشر ايمنالظواهري په نښه او وواژه، د محمد علي سيف په مشرۍ د پاکستان مرکچي پلاوی د تحريک طالبان پاکستان ډلې له مشرانو سره پر مذاکراتو بوخت وو.
خو دغه مذاکرات څو ورځې وړاندې پرته د کومې محسوسې پايلې له ترلاسه کېدو پای ته رسيدلي دي.
